മലപ്പുറം:വിവാഹാവശ്യത്തിന് പണം സംഘടിപ്പിക്കാന്‍ പോയശേഷം കാണാതായ മലപ്പുറം പള്ളിപ്പുറം സ്വദേശി വിഷ്ണുജിത്ത് കോയമ്പത്തൂരിലേക്ക് പോയതായി പൊലീസ് കണ്ടെത്തി. കോയമ്പത്തൂരിലേക്ക് പോകാന്‍ വിഷ്ണുജിത്ത് കെ.എസ്.ആര്‍.ടി.സി ബസില്‍ കയറുന്നതിന്റെ സി.സി.ടി.വി ദൃശ്യങ്ങളാണ് പൊലീസിന് ലഭിച്ചത്. ഇതേതുടര്‍ന്ന് വിഷ്ണുജിത്തിനായുള്ള അന്വേഷണം പൊലീസ് കോയമ്പത്തൂരിലേക്ക് വ്യാപിപ്പിച്ചു.
പ്രതിശ്രുത വരനായ മങ്കട പള്ളിപ്പുറം കുറന്തല വീട്ടില്‍ വിഷ്ണുജിത്തിനെ (30) അഞ്ച് ദിവസമായി കാണാനില്ലെന്ന പരാതിയുമായി കഴിഞ്ഞ ദിവസമാണ് ബന്ധുക്കള്‍ രംഗത്തെത്തിയത്. തിരോധാനത്തില്‍ ദുരൂഹതയുണ്ടെന്നും വിവാഹാവശ്യത്തിനുള്ള പണത്തിനായി പാലക്കാട്ടെ സുഹൃത്തിന്റെ അടുത്തേക്ക് സെപ്റ്റംബര്‍ നാലിന് രാവിലെ ആറോടെ വിഷ്ണുജിത്ത് പോയതാണെന്നും ബന്ധുക്കള്‍ പറഞ്ഞു..രാത്രി 8.10നാണ് അവസാനമായി വീട്ടുകാരുമായി ഫോണില്‍ ബന്ധപ്പെട്ടത്. തുടര്‍ന്ന് ഫോണ്‍ സ്വിച്ച് ഓഫ് ആയി. കഞ്ചിക്കോട് നിന്നാണ് വിഷ്ണുജിത്തിന്റെ ഫോണ്‍ സ്വിച്ച് ഓഫ് ആയതെന്ന് പൊലീസ് കണ്ടെത്തിയിട്ടുണ്ട്.
ഞായറാഴ്ചയായിരുന്നു വിഷ്ണുജിത്തിന്റെ വിവാഹം നടക്കേണ്ടിയിരുന്നത്. ഒരു ലക്ഷത്തോളം രൂപ സുഹൃത്തില്‍ നിന്ന് വാങ്ങി തിരികെ മടങ്ങുമെന്നാണ് വിഷ്ണുജിത്ത് വീട്ടുകാരെ ഫോണില്‍ അറിയിച്ചത്.
